• عبدالعزيز الهديان يفاجئنا ويفاجئ الجمهور ومن وجهه واضح أنه فاجأ نفسه بأغنية ودخولية جديدة، وحركة حصرية جدًا هزّت المسرح *حرفيًا هزّت.

  

• أنا وابراهيم جرّبنا المترو مو لأننا أطفال وندوّر الهبة، بس قاعدين نحاول ننتمي للرياض بأي شكل من الأشكال.

  

• أبوسارة وأبوسارة يقفون على نفس خشبة المسرح في أول رحلة للكروز، الوضع كان: هاها .. هاها .. هاها .. يعني أغنية عبادي لو ما فهمتوا.

• أسامة بازيد قرّر يرجّع ستايل السكسوكة بعد أكثر من سنة، تزامن مع هذا القرار متابعته المستمرة للنشرة الجويّة، وزيارات متكررة للنخيل مول لأسباب مجهولة.

  

• هذا مو خبر بس هذا تمهيد لسالفة الأسبوع عشان تعرفون قد ايش اللاين-اب وترتيبه مهمة صعبة.

  

كيف ومين يسوّي اللاين-اب في كوميدي بود؟👨🏻‍🔬

لو سألت «كيف تسوون اللاين-اب؟» غالبًا بيجيك جواب «مدري، أبوسارة يسويه على كيفه» وهو جواب مب غلط، لكن برضو مب صح 100% لأني ما أسويه على كيفي..

مبدئيًا في حال كنت ما تعرف وشو اللاين-اب تقدر تشيّك على شرح وشو اللاين-اب هنا.

في كل مرة أسوي لاين-اب أنا ما أشوف عرض شخص واحد🧍🏻‍♂️، أنا أشوف عرض متكامل، ساعة ونص لازم كلها ضحك، تبدأ صح وتقفل صح، وهذا اللي أحاول أسويه في كل مرة أسوي اللاين-اب.

مبدئيًا في كوميدي بود ما نطلع إلّا أفضل الكوميديانز على مستوى المملكة، فتكون عندي مشكلة حلوة وهي أن عندي عدد كبير من الأساطير لازم أوزّعهم في اللاين-اب؛ عشان يكون عندنا عرض أسطوري متكامل🎊.

فتوزيع اللاين-اب ما يكون على حسب مستوى الكوميديانز -لأن كلهم أساطير- بس يكون على حسب أسلوب كل كوميديان🗣️، مثلًا ما ينفع نبدأ الليلة بكوميديان هادي وطاقته منخفضة، هذا مكانه في النص، وما ينفع أحط اثنين أو ثلاثة ورا بعض كلهم عندهم نفس الأسلوب؛ لأن هذا بيسوي تكرار بالأسلوب عند الجمهور ويحسون أنهم يشوفون نفس النكت بأصوات مختلفة📣 📢 🔈.

فـ عشان كذا بعد تجارب كثير وليالي كثير؛ طلعت بهذي الخمس معايير🖐🏼 اللي تساعدني إني أسوي عروض كوميدي بود الأسبوعية:

• العدد في بداياتنا جربنا نسوي ليالي فيها 3 كوميديانز بس وجربنا نسوي ليالي فيها 15 كوميديان، وأفضل عدد وصلنا له يكون بين 6 – 8 كوميديانز بحيث يكون في مساحة لأي مفاجئة تصير، نقدر نضيف أو ننقص واحد وحنا مرتاحين بدون ضغط على اللاين-اب.

• توزيع الأساليب عرفنا بعد تجارب كثيرة أن الهوست عليه ضغط في البداية انه يعرف يسوي تفاعل مع الجمهور، يضحكهم ويسخّنهم لأول كوميديان، وفي بداية الليلة لازم تكون مع كوميديان طاقته عالية ويكون أسلوبه قصصي أكثر، ما ينفع نبدأ الليلة مع كوميديان ون لاينر أو كوميديان يقدم كوميديا سوداء، عشان تعرف أكثر عن أنواع الكوميديا تقدر تشوفها بنشرتنا هنا.

• توزيع اللهجات صح إننا ضحكة أهل الرياض، لكننا نقدّم كوميديا سعودية أصيلة من كل مناطق المملكة🇸🇦، وعشان نضمن تنوّع رهيب في الليلة أحرص قدر المستطاع أن الجمهور ما يسمع نفس اللهجة مرتين ورا بعض.. بس هذا كله يعتمد على مين موجود في الليلة.

• مكان الكوميديان ممكن يظلمه! فيه كوميديانز ممكن تظلم مستواهم إذا خليتهم في الأخير ولو حطيتهم في بداية العرض بيجيبون ضحك أكثر، والعكس كذلك .. وهذي تجي بالخبرة والتجارب مالها معادلة واضحة (:

• مافيه معيار خامس بس حسيتها رهيبة خمسة معايير.

  هذي هي معاييرنا اليوم، وكل هالكلام ممكن يتغير بكرا.. ما زلنا نتعلم.

- أبـوســـــارة ✍️