• في حفل شتاء ثمانية قدّم عبادي، وأبوسارة، وأبوعيد، وأسامة بازيد عرض ستاند-اب لموظفين ثمانية، عبادي يقول: «أعجبهم العرض بس مادري شفيهم ما كانوا يضحكون.»

  

• الشباب صايرين راعين كشتات من تالي، المشكلة انهم يرجعون من البر عالستيج على طول ويعتقدون أن محد يقدر يشم ريحة الحطب.

  

• أبوسارة يشارك في مسلسل رمضاني بدور «مدير نادي كوميدي» ويهاوش أحد الكوميديانز بعد ما قال نكتة سخيفة. طبعًا أبوسارة تعب جدًا في تجسيد هذي الشخصية الجديدة عليه، وماقد سوا شي زي كذا في حياته وكل الكوميديانز يشهدون له بالحنان والطيبة.

وش الأدوات اللي تقوّي النكتة؟🦾

الحمدلله اليوم النشرة تكمّل عددها الثلاثين!🥳، 30 عدد من النشرة وحنّا ننظّر عن النكتة والتنكيت؛ شرحنا أغلب المصطلحات في مجال الستاند-اب والكوميديا بشكل عام. وفي لحظة إدراك جاتني اننا ماقد شرحنا وش النكتة أصلاً؟

في هذا العدد من النشرة: النُكتة وأدواتُها.

النكتة لغةً: مشتقة من الجذر «نَكَتَ» والذي يدل على إحداث أثر دقيق، وقال ابن منظور في لسان العرب: «النكتة: الطرفة من القول، والجمع نُكت».

اصطلاحًا: تعرّف النكتة بأنها كلام قصير أو موقف يُصاغ بأسلوب طريف وذكي بهدف إثارة الضحك.

ياسلااام.. إثارة الضحك، الضحك هو الهدف الأول والأخير من أي نكتة؛ وعشان يزيد مستوى هذا الضحك، أكيد في أدوات ترفع من جودة النكتة وتقوّي من أثرها.

التكوين الأساسي للنكتة🧱..

قبل لا نتكلم عن الأدوات.. أي نكتة في الحياة لها مكوّنين رئيسيين:

1- البناء (Build-up) 2- المفاجأة (Punchline).

مثال:- (في قزم بينتحر..)> هذا بناء.. (طب من الرصيف.)> هذا Punchline.

والحين نقدر ندخل على الأدوات اللي لو عرفت تستخدمها وتضيفها لنكتك -إن شاء الله- بتضحّك أكثر؛ لأن القبول من الله وانا اخوك.

ذبة إضافية (Tag)

هذي الأداة تستخدمها بعد ما تنتهي من النكتة الرئيسية، تضيف تعليق قصير وساخر يخلّي الضحكة على البنش-لاين أقوى وأطول.

نداء العودة (callback)

الصراحة مالقيت لها ترجمة مناسبة فترجمتها حرفيًا😂، شفت لما صديقك بوسط الجلسة يذب ذبة عن سالفة صارت قبل أسبوع وتصير تضحّك مرة؟ هذا كول-باك. وككوميديان تسويه بأنك ترجع تقول نكتة أو تجيب طاري موقف قلته في عرضك. ميزة الكول-باك أن البناء انت سويته من قبل؛ وهذا يخلي الوصول للنكتة بشكل أسرع، ويجيب ضحك مضاعف، ويعزّز من ارتباطك مع الجمهور لأنك تحسسهم إن في بينك وبينهم نكت خاصّة وزيادة على الضحك يجيهم شعور حلو انهم فهموها.

تكرار النكتة (Running)

شفت ذبة صديقك عن السالفة اللي صارت قبل أسبوع؟ في بعض الحالات تكون الذبة رهيبة ومرنة وقابلة للدخول في أغلب السياقات؛ فتصيرون تعيدونها وتكررونها دايمًا وفي كل مرة تضحّك أكثر، وأحيانًا يبهرك واحد من أصدقائك في أنه شلون قدر يدخّل نفس النكتة في سالفة شاطحة ومالها دخل. كذا انتوا حولتوا النكتة لـ Running Joke أو بالعربي: «نكتة متكررة» وككوميديان إذا بتستخدم هذا الاسلوب لازم تكون زي خويك المبهر وتحاول تقول النكتة بشكل غير متوقع، وأحيانًا يكون مضحك لو كان جدًا متوع وخليت الجمهور هو اللي يقولها بدالك.

تمثيل النكتة (Act-Out)

شفت ذبة صديقك.. لا لا أمزح. الآكت-آوت أداة واضحة من اسمها: تحوّل النكتة من شي تقوله إلى حركة تمثلها، أو نبرة صوت أو تتكلم بلهجة مختلفة تجسد فيها أحد شخصيات القصة اللي ترويها. مثلاً: تستخدم الستاند حق المايك كأنه شخصية وتقعد تتكلم مع الستاند.

التقليد (Impressions)

هذي الأداة تعتمد على تقليد الشخصيات أو الأصوات المعروفة. السر في هذي الأداة انتباهك للتفاصيل الدقيقة في الشخصية اللي بتقلدها وكيف تضخّم هذي التفاصيل وتبالغ في أداءها، وتأثيرها الكوميدي قوي لأن الجمهور يتفاعل أول ما يتعرف على الشخصية اللي قاعد تقلدها، ولأن الجمهور عنده مشاعر مسبقة عن الشخصية سواء كانت إيجابية أو سلبية فهذا يعزّز استجابتهم للنكتة.

وبس ياصاحبي.. هذي الأدوات لو عرفت منها اللي يناسبك ومتى وكيف تستخدمها نكتك بيصير تأثيرها أقوى، والتنوّع في استخدام الأدوات يخلّي العرض ممتع ومضحك أكثر.. لكن في الأول والأخير القبول من الله وانا اخوك. كيف الكول-باك؟

- ناصر بامشموس ✍️